ప్రాణాలు తీస్తున్న కాస్మొటిక్ సర్జరీలు

రోజురోజుకీ సౌందర్య చికిత్సలపై నేటి యువతరం ప్రత్యేక శ్రద్ధ చూపించడం ఆయా సెంటర్ల నిర్వాహకులకు కాసులను కురిపిస్తున్నాయి. ఒక్క భారత దేశంలోనే ప్రతీఏటా సుమారు 460 కోట్ల రూపాయల వ్యాపారం ఒక్క కాస్మోటిక్ సర్జరీ ల పేరుతో జరగడాన్ని చూస్తే  అది ఎంతగా పెట్రేగి పోతుందో అర్ధమవుతుంది. మొన్నటికి మొన్న ఎత్తు పెరగాలనే అత్యుత్సాహంతో హైదరాబాద్ కి చెందిన నిఖిల్ కాళ్ళకి ఇల్ జర్వ్ చికిత్స చేయించుకొని నడవరాని స్థితిలోకి చేరిన ఘటన బ్రేకింగ్ న్యూస్ గా మారింది. ఆ సంఘటన మరువకముందే లేటెస్ట్ అప్డేట్ ప్రకారం చెన్నై కి చెందిన ఓ మెడిసిన్ స్టూడెంట్ బట్టతల పోవడానికి హెయిర్‌ ట్రాన్స్‌ ప్లాంట్‌ సర్జరీ చేయించుకొని మృత్యువాత పడటం కలవరపరుస్తుంది. చెన్నైకి చెందిన సంతోష్‌(22) మెడిసిన్‌ చివరి సంవత్సరం చదువుతున్నాడు. అతనికి బట్టతల ఉంది. అది చూసి అందరూ నవ్వుతూ హేళన చేస్తారేమో అని  భావించి గత నెలలో రూ.73 వేలు చెల్లించి హెయిర్‌ ట్రాన్స్‌ ప్లాంట్‌ సర్జరీ చేయించుకున్నాడు. మొత్తం 1,200 వెంట్రుకలను తల భాగంలో జొప్పించడానికి 10 గంటల పాటు ఇద్దరు ( వైద్యులు ? ) సర్జరీ చేశారు. సర్జరీ అయిన తర్వాత అనుకోకుండా సంతోష్‌కి తీవ్ర జ్వరం వచ్చి మూడో రోజే చనిపోయాడు. వైద్యుల నిర్లక్ష్యం వల్లే తమ కుమారుడు చనిపోయాడంటూ ఆందోళనకు దిగారు సంతోష్ తల్లిదండ్రులు. జరిగిన ఘటనపై అధికారులు దర్యాప్తు చేపట్టగా, సంతోష్ కి సర్జరీ చేసిన  హెయిర్‌ ట్రాన్స్‌ ప్లాంటేషన్‌ సెంటర్‌కు కేవలం హెయిర్‌ సెలూన్‌ పేరుతో మాత్రమే లైసెన్స్‌ ఉందనీ.. దాని గడువు కూడా రెండు నెలల క్రితమే అయిపోయిందని తెలిపారు. ప్రస్తుతానికి అధికారులు సెంటర్‌ను సీజ్‌ చేసి స్టేట్‌ మెడికల్‌ కౌన్సిల్‌ సెంటర్‌ నడుపుతున్న యాజమాన్యానికి నోటీసులు పంపింది.ఖననం చేసిన సంతోష్‌ మృతదేహాన్ని వెలికి తీసి పోస్ట్‌ మార్టం నిమిత్తం తరలించారు. హెయిర్‌ ట్రాన్స్‌ ప్లాంట్‌ సర్జరీ వికటించి ప్రాణాలు కోల్పోయిన సంతోష్ ఉదంతం పై సర్వత్రా చర్చ జరుగుతుంది. కనీస ప్రమాణాలు పాటించని కాస్మోటిక్ సెంటర్లపై ప్రభుత్వం ఉదాసీనంగా వ్యవహరించడం విమర్శలకు దారితీస్తుంది. అందం మోజులో పడి నిండైన జీవితాన్ని యువత బలి చేసుకోవోద్దని పలువురు వైద్యులు సూచిస్తున్నారు. ఈ  నేపథ్యంలో ..

నిపుణుల పర్యవేక్షణలో చేయించుకోవలసిన కొన్ని సర్జరీల వివరాలు :

బోటోక్స్ సర్జరీ : ఈ తరహా చికిత్సలు ముఖ్యంగా సినిమా తారలు, సెలబ్రిటీస్  తమ ముఖంపై ఉన్న ముడతలు వగైరా వంటి వాటిని తొలగించుకొనుటకు ప్రధానంగా చేయించుకుంటారు. ఈ చికిత్స వికటిస్తే ఆయా ముఖ కండర భాగాలు పక్షవాతానికి గురయ్యే ప్రమాదముంది.

కెమికల్  పీల్స్ : ముఖంపై వయస్సు వల్ల వచ్చే స్పాట్స్ కనబడకుండా ఉండటానికి ఈ చికిత్సను చేయించుకుంటారు. ఈ చికిత్స ఉపయోగించే కెమికల్స్ సరైన మోతాదులో ఉపయోగించనట్లయితే చర్మం కాలిపోయే ప్రమాదముంది.

ఫేస్ లిఫ్ట్ సర్జరీ : కళ్ళు, గవద, దవడ క్రిందనున్న చర్మం వదులుగా వేలాడుతూ ఉన్న వాళ్ళు ఈ తరహా చికిత్సలు చేయించుకుంటారు. చికిత్స జరుగునప్పుడు ఏదైనా పొరపాటు జరిగినట్లయితే, ఇన్ఫెక్షన్ తో పాటు రక్తం కారడం వంటి ప్రమాదాలు సంభవించవచ్చు.

రైనో ప్లాస్టి : ఈ తరహా శస్త్ర చికిత్సను సాధారణంగా 25-30 సంవత్సరాల మధ్య వయస్కులు చేయించుకుంటారు. ఈ చికిత్స ప్రధానంగా ముక్కు ఆకారంలో మార్పులకు సంబందించినదిగా సాగుతుంది. సర్జరీ సరిగా జరగనట్లయితే, ముక్కు రంద్రాలు, శ్వాస సమస్యలు తలెత్తే ప్రమాదం ఉంది.

హెయిర్ ట్రాన్స్ ప్లాంట్ : బట్టతల ఉన్నవారు జుట్టు కోసం ఈ చికిత్స చేయించుకుంటారు. చికిత్స సమయం దాదాపు 6 నుండి 8 గంటలుగా ఉంటుంది. చికిత్సా సమయం పెరిగితే ఇన్ఫెక్షన్ కి గురయ్యే ప్రమాదం ఉంది.  ఇన్ఫెక్షన్ తో పాటు రక్తం కారడం, మచ్చలు, తలపై గడ్డలవడం జరిగవచ్చు.  

సృష్టిలో ఉన్న ప్రతీ ఒక్కరూ అందంగా  ఆకర్షణ గొలిపే పరిపూర్ణులుగా ఉన్నారని చెప్పలేము. అది చూసే కళ్ళను, మనసులను బట్టి ఉంటుంది. అందం అనేది మనసుకుసంబందించినదే గానీ, శరీరానికి కాదు. అందుకే, బాహ్య సౌందర్యం కన్నా అంతఃసౌందర్యం గొప్పదంటారు. యువత ఇప్పటికైనా ఈ సత్యాన్ని గమనిస్తే తమ పండంటి జీవితాన్నికాపాడుకున్నవారవుతారు.

బఫెట్ భలే స్కెచ్

వారెన్ బఫెట్ – షేర్ మార్కెట్, వ్యాపార రంగంలో ఈ పేరు వినని వారుండరంటే అతిశయోక్తి కాదు. ప్రపంచ షేర్ మార్కెట్ కదలికల్ని పసిగట్టి తదనుగూణంగా వివిధ సంస్థల్లో పెట్టుబడులను సమయానుకూలంగా పెడుతూ బ్రేకింగ్ న్యూస్ లకు కేంద్ర బిందువుగా ఉంటాడని  ఈయనకు పేరుంది. ప్రతీ యేటా ప్రపంచ టాప్ – 5 ధనవంతుల జాబితాలో తిష్టవేసే ఈయన తాజాగా వేస్తున్న బిజినెస్ పాచిక  మార్కెట్ వర్గాలను ఆశ్చర్యానికి గురిచేస్తుంది.ప్రతీ రోజు షేర్ మార్కెట్ బిజినెస్ లేటెస్ట్ అప్డేట్స్లో ముందుగా ఉండే ఈయన  ఈ ఆటలో పావుగా ఉపయోగిస్తుంది ఏదో చిన్న కంపెనీ ఐతే ఇంత చర్చ ఉండేది కాదేమో! కానీ, ఈ సారి ఆయన వినోద రంగంలో గుత్తాదిపత్యం సొంతం చేసుకోవడానికి వదులుతున్న అస్త్రం “యాపిల్”.

సెల్‌ఫోన్‌ రంగంలో  యాపిల్‌ సృష్టించిన  విప్లవం అంతా ఇంతా కాదు. ఆ ఫోన్ ఒక స్టేటస్ సింబల్ గా భావించిన రోజులు ఉన్నాయంటే యాపిల్ హవా ఏమిటో అర్డంచేసుకోవచ్చు. కానీ, పరిస్థితి మారింది. ఇప్పుడు అనేక ఇతర బ్రాండ్‌ల పోటీని అంతగా తట్టుకోలేని పరిస్థితికి యాపిల్ సంస్థ వచ్చిందని గత కొన్నేళ్లుగా సంస్థ సాగిస్తున్న అమ్మకాల సరళిని చూస్తే తెలుస్తుంది. యాపిల్‌ కంపెనీ ఇక దివాలా తీస్తుందనే వదంతులూ మార్కెట్‌లను గతంలో ముంచెత్తాయి.ఇది అప్పట్లో ట్రెండింగ్ న్యూస్ గా హాల్ చల్ ను సృష్టించడం విశేషం. సరిగ్గా ఆ సమయంలోనే బఫెట్ యాపిల్‌ షేర్‌లను అనేకంగా ( ఎన్ని షేర్స్ కొన్నది వెల్లడించలేదు ) కొనుగోలు చేసి అందరినీ ఆశ్చర్యపరిచాడు. అంతే కాకుండా ప్రస్తుత గడ్డు పరిస్థితిని యాపిల్ ఎదుర్కొని మార్కెట్ లో ఆదాయాన్ని ఆర్జించే విధంగా తయారవడానికి అత్యంత లాభసాటిగా సాగుతున్న  వినోదరంగంలోకి దిగాలని సదరు సంస్థకు వారెన్ దిశా నిర్దేశం చేశాడని వినికిడి. ఇప్పటికే‘మ్యూజిక్‌’, ‘సెట్‌బాక్స్‌’ రంగాలలోకి దిగిన యాపిల్‌ కంపెనీ, ఇప్పుడు వినోద రంగంలో పేరెన్నికగన్న సంస్థలతో సంప్రదింపులను జరుపుతున్నట్లు విశ్వసనీయ సమాచారం.

మునుగిపోతున్న యాపిల్ పడవను షేర్స్ పెట్టి మరీ కాపాడాడని బఫెట్ పై ప్రశంసల జల్లు కురుస్తున్నా..సరిగ్గా గమనిస్తే, వారెన్ వ్యూహం మరోలా ఉందన్నది సులువుగానే అర్ధం చేసుకోవచ్చు.. వినోదరంగంలో ప్రవేశించాలని యాపిల్ కి హితబోధ చేసిన వారెన్ .. టైమ్‌ వార్నర్‌ కంపెనీతో గానీ, ఎంటర్టైన్మెంట్ రంగంలో దూసుకుపోతున్న నెట్‌ప్లెక్స్‌ సంస్థల ద్వారా గానీ వినోద రంగంలోకి అడుగీడమని  సూచించాడట! ఆయన నిర్దేశనం మేరకు యాపిల్ సంస్థ ఆయా కంపెనీలతో చర్చలను ప్రారంభించింది. అమెరికాలో వినోదరంగంలో ప్రధాన పోటీ నెట్‌ప్లెక్స్‌ సంస్థ, టైమ్‌ వార్నర్‌ కంపెనీకి మధ్యన ఉంటుంది. వార్నర్‌ బ్రదర్స్‌ స్టూడియో, హెచ్‌బిఓ ఛానల్‌ల మాతృ సంస్థ అయిన టైమ్‌ వార్నర్‌ కంపెనీలో  బఫెట్ కి ఇంతకు ముందే పెట్టుబడులున్నాయి. అంటే, ఇపుడు వినోద రంగంలో అడుగీడుతున్న యాపిల్ తన కంపెనీ టైమ్‌ వార్నర్‌తో కలిస్తే ప్రధాన పోటీదారైన నెట్‌ప్లెక్స్‌ ను దాటి ముందంజలో ఉండొచ్చని  పథకం వేసాడు. ఒక వేళ  యాపిల్ తన కార్యాచరణను నెట్‌ప్లెక్స్‌ తో కలిసి చేసినా వారెన్ కే లాభం. ఇప్పటికే టైమ్‌ వార్నర్‌ తో దూసుకెళ్తున్న తను.. యాపిల్ ద్వారా నెట్‌ప్లెక్స్‌ కంపెనీపై సైతం పరోక్షంగా అజమాయిషీ చేయొచ్చు. అంటే, ఏ విధంగా చూసినా వారెన్ వేసిన స్కెచ్ తననింకా రిచ్ చేస్తున్నట్లే కదా !

జరుగుతున్న పరిణామాలను నిశితంగా పరిశీలిస్తున్న మార్కెట్ నిపుణులు బఫెట్ ఆలోచనకు సలాం చేయకుండా ఉండలేకపోతున్నారు. నిజమే కదా!

వారెన్ బఫెట్ నమ్మే వ్యాపార సూత్రాలు :
1. తెలివిగా ఖర్చు చేయండి  : మీకు అవసరం లేని వస్తువులను కూడా కొనుక్కుంటూపోతే ఏదో ఒకరోజు డబ్బులకోసం మీకిష్టమైన వస్తువును కూడా అమ్ముకోవాల్సి వస్తుంది.
2.ఊహించలేని పరిణామాల కోసమూ ఆదా చేయండి:  ఖర్చు పెట్టాక మిగిలింది ఆదా చేయడం కాదు, పొదుపు చేశాక మిగిలింది ఖర్చు చేయాలి.
3.దీర్ఘకాలిక వ్యూహం, సహనం ఉండాలి : నైపుణ్యత, శక్తి సామర్థ్యాలున్నా కొన్ని పనులు పూర్తికావడానికి వేచిచూడక తప్పదు. బిడ్డకు జన్మనిచ్చేందుకు తల్లికి నవమాసాలు పడుతుంది. అంతేగాని తొమ్మిది మంది గర్భవతుల ద్వారా ఒకనెలలో బిడ్డను భూమి మీదికి తీసుకురాలేం కదా.
4.రుణాలకు వీలైనంత దూరంగా ఉండాలి : చాలామంది అధికంగా మద్యం సేవించడం, రుణాలు తీసుకోవడం మూలాన జీవితంలో వైఫల్యం చెందడం గమనించాను. ఈ ప్రపంచంలో అప్పులు చేయాల్సిన అవసరం లేదు. మీరు తెలివిగల వారైతే అప్పు చేయకుండానే చాలా డబ్బు సంపాదించొచ్చు.
5.నష్టాలు ఎదుర్కొనేందుకు సిద్ధంగా ఉండాలి : చేస్తున్న పనిలో మీకు తెలియకుండా సంభవించేదే రిస్క్. దాన్ని ఎదుర్కోవాలి. రిస్క్ తో పాటు  నిజాయితీ చాలా ఖరీదైంది, చిల్లర గాళ్ల నుంచి దాన్ని ఆశించకు.

వారెన్ బఫెట్ షేర్స్ ఉన్న మరికొన్ని ప్రధాన కంపెనీలు :

క్రాఫ్ట్ హైజెన్ కంపెనీ, కొకొకోలా, ఐబిఎం, అమెరికన్ ఎక్స్ ప్రెస్ , పిలిప్స్, వాల్ మార్ట్, మూడీస్, చార్టర్ కార్పోరేషన్, బ్యాంక్ ఆఫ్ న్యూయార్క్, మాస్టర్ కార్డ్,జాన్సన్ & జాన్సన్, ట్వంటీ ఫస్ట్ సెంచరీ, లీ ఎంటర్ప్రైజెస్ మొదలగునవి .